Ысык-Көлүм, саламатсыңбы?!
Толкундардын шарпасын эңсеп
Кыялдарга эрким багынып,
Шамал менен жарышып учуп
Келдим, көлүм сени сагынып.
Сулуулугуң Адамзат баалап
Дүйнө турат сага суктанып,
Ажарыңа абдан жарашкан
Бермет сөйкөң алчы тагынып.
Көк асманга кучагың жайып
Качан болсо тосуп аласың,
Сан кылымдар өлбөй жашаган
Сен кыргызга эне-атасың,
Көргөнүмө бактылуумун мен,
Ысык-Көлүм, саламатсыңбы?!
Ак чокулар булут оронгон
Чар тарабын тоолор курчаган,
Күн шооласы тегиз чачылып
Чалкыйт көлүм, көз жоосун алган.
Алтын кумдуу жээги керемет
Тойбой жутуп таза абадан,
Ыйык сууга келген адамдар
Тирүүлүккө миң таазим кылган.
Көк асманга кучагың жайып
Качан болсо тосуп аласың,
Сан кылымдар өлбөй жашаган
Сен кыргызга эне-атасың,
Көргөнүмө бактылуумун мен,
Ысык-Көлүм, саламатсыңбы?!
Мөлтүрөгөн тунук сууң дары
Муздай элем, сенде ээридим,
Миң ооруунун чындап дабасы
Түгөнбөсүн ушул мээримиң.
Жараткандан насип буюрган
Байлыгысың тоолуу жеримдин,
Түбөлүккө эч бир алмашкыс
Тумарысың кыргыз элимдин!
Көк асманга кучагың жайып
Качан болсо тосуп аласың,
Сан кылымдар өлбөй жашаган
Сен кыргызга эне-атасың,
Көргөнүмө бактылуумун мен,
Ысык-Көлүм, саламатсыңбы?!
Абдыжапар Аккулов Ысык-Көл, Июль – 2016 ж.