Баткенде “Мыкты кесип ээлери” кимдер болду?

Жакында Билим берүү жана илим кызматкерлеринин профсоюзунун Баткен  областтык комитети тарабынан облустун билим берүү мекемелеринде 2013-жыл-иштерман жылына карата уюштурулган “Мыкты кесип ээлери” кароо-сынактарынын жыйынтыгы чыгарылды.

Областтык комитеттин президиумунун күн тартибинде 2013-жылда аткарылган иштердин жыйынтыктары, Билим берүү жана илим кызматкерлеринин профсоюзунун Баткен областтык комитетинин 2014-жыл үчүн иш планын бекитүү жана “2013-жыл иштерман жылына” карата өткөрүлгөн кароо-сынактардын жыйынтыктары жөнүндөгү маселелер каралды.

Жыйынтыгында үчүнчү маселе боюнча “Жылдын мыкты иш берүүчүсү” кароо-сынагынын жеңүүчүлөрү аныкталып, 1-орун Баткен шаарынын Ж.Бөкөнбаев атындагы орто мектебинин директору Айгүл Алдашевага ыйгарылып, 1-даражадагы диплом жана жылма экрандуу сыналгы менен сыйланды. 2-орун Кадамжай районундагы Т.Тургунов атындагы орто мектебинин директору Абдикаар Суюновго ыйгарылып, 2-даражадагы диплом жана жартылай жылма экрандуу сыналгы менен сыйланды. 3-орунду Сүлүктү шаарындагы № 4 Р.Жолбаев атындагы орто мектебинин директору Нургүл Ырысовага жана Лейлек районундагы В.И.Ленин атындагы орто мектебинин директору Рахматулло Искандаровго ыйгарылып, 3-даражадагы диплом жана ар бири кичи толкундуу печка менен сыйланышты.

Ал эми облустук “Жылдын мыкты мугалими” кароо-сынагынын жыйынтыгында 1-орун Кадамжай районунун Б.Айтматов атындагы орто мектебинин кыргыз тили жана адабияты мугалими Байзакова Гүлмамага ыйгарылып, 1-даражадагы диплом жана жылма экрандуу сыналгы менен сыйланса, 2-орунга Баткен шаарындагы В.И.Ленин атындагы орто мектебинин кыргыз тили жана адабияты мугалими С.Рахматовага ыйгарылып, 2-даражадагы диплом жана жартылай жылма экрандуу сыналгы менен сыйланды. 3-орунду Сүлүктү шаарындагы И.Раззаков атындагы № 7 орто мектебинин башталгыч класстарынын мугалими Кудайбердиева Айнурага жана Кызыл-Кыя шаарындагы № 1 Д.Карбышев атындагы орто мектебинин англис тили мугалими Калданова Разияга ыйгарылып, 3-даражадагы диплом жана ар бири кичи толкундуу печка менен сыйланышты.

Облустук “Жылдын мыкты тарбиячысы” кароо-сынактарынын жыйынтыгында 1-орун Баткен шаарындагы “Өрүкзар” балдар бакчасынын музыкалык тарбиячысы Султанова Гүлмира 1-даражадагы диплом жана жартылай жылма экрандуу сыналгы менен сыйланды. 2-орун Кызыл-Кыя шаарындагы № 22 “Ласточка” балдар бакчасынын тарбиячысы Сыдыкова Гүлнара 2-даражадагы диплом жана тефафорд менен сыйланса, 3-орун Баткен районундагы “Актилек” балдар бакчасынын тарбиячысы А.Усманова 3-даражадагы диплом жана тефафорд менен сыйланды.

Гүлчехра Тажибаева, Баткен облусу